Smiðjuhelgar

Grunnskóli Borgarfjarðar starfar á þremur stöðum, á Hvanneyri, Kleppjárnsreykjum og Varmalandi. Þetta voru áður sjálfstæðir skólar en voru sameinaðir árið 2010. Smiðjuhelgar hafa frá upphafi verið hluti af skólastarfinu. Áður höfðu þær verið við lýði í Varmalandsskóla frá árinu 2007. Smiðjurnar eru haldnar tvisvar sinnum á hverju skólaári, fyrir og eftir áramót og eru ætlaðar nemendum á unglingastigi. Unglingarnir eru einum tíma skemur á viku í skólanum en viðmið gera ráð fyrir, en í staðinn vinna þeir með þessum hætti eina helgi á önn.

Tilgangur smiðjanna er að mæta vali fyrir unglingana með öðrum hætti en almennt tíðkast og gefa þeim kost á að hafa meira um val sitt að segja. Í fámennum skólum byggjast valgreinarnar oft á því sem kennarar innan hvers skóla treysta sér til að bjóða upp á að kenna og vill valið þá stundum verða einsleitt. Með smiðjuhelgunum fá nemendur fleiri tækifæri. Þeir setja fram hugmyndir sínar um það sem þeim finnst áhugavert og langar að hafa í vali. Unnið er út frá þeirra hugmyndum og leitast við að bjóða uppá smiðjur sem flestir hafa áhuga á hverju sinni.

Fjöldi smiðja fer eftir fjölda nemenda. Að undanförnu hafa unglingar úr Reykhólaskóla og Laugargerðisskóla verið með okkur í þessari vinnu og á síðasta skólaári bættust unglingar úr Flóaskóla í hópinn. Þetta er skemmtileg viðbót við nemendaflóru smiðjuhelganna og gengur nemendum vel að aðlagast og vinna saman. Smiðjurnar hafa verið kostaðar af skólunum og þátttökugjöld engin.

Þegar dagskrá liggur fyrir sendum við út valblað sem nemendur fylla út og skila til skólans. Hver nemandi velur eina smiðju og vinnur í henni allan tímann. Hér má sjá dæmi um upplýsingar um smiðjur sem nemendur fá í hendur til að velja.

Smiðjuhelgi 20.‒21.mars 2015 á Varmalandi

Þá er það smiðjuhelgin! Búið er að fá leiðbeinendur í eftirtaldar smiðjur og bið ég ykkur að láta nemendur velja.

Muna að að láta þá velja 2 smiðjur, fyrsta og annað val eftir áhuga og við munum síðan raða niður í smiðjurnar eftir bestu getu. Vonandi fá allir fyrsta val, sjáum til hvernig áhugi þeirra liggur.

Kvikmyndagerðasmiðja Hugmyndin er að taka upp mynd sem verður sýnd á laugardeginum kl. 14:30. Þau læra leikstjórn, handritsgerð, kvikmyndatökur, leiklist og eftirvinnslu. Smiðjan byggist á hópavinnu. Kennarar: Annetta Ragnarsdóttir og Georg Erlingsson Merritt (leikstjórar og framleiðendur). Kennarar frá Kvikmyndaskóla Íslands. 12 nemendur komast í þessa smiðju
Blaksmiðja Sólrún Halla Bjarnadóttir íþróttafræðingur og blakari mun vera með þessa smiðju og sjá um að þeir sem hana velja fái næga hreyfingu og skemmtun í blakinu. 12-16 nemendur komast að í þessa smiðju
Björgunarsveitarsmiðja Björgunarsveitin OK mun sjá um þessa smiðju undir leiðsögn Þórs Þorsteinssonar. 10-12 nemendur geta tekið þátt í þessari smiðju
Reiðtygjagerð Jómundur G. Hjörleifsson mun kenna i þessari smiðju. Hann er okkur að góðu kunnur og hefur áður kennt reiðtygjagerð fyrir okkur.
Hann mun kenna ykkur að gera tauma og fleira spennandi fyrir hestamennskuna. 8-10 nemendur komast að í þessa smiðju
Skylmingarsmiðja Skylmingarsambandið mun útvega okkur kennara í þessa smiðju. Undirstöðuatriði skylminga kennd. Allur búnaður sem þarf til verður skaffaður af þeirra hálfu. Kennari er Sævar Baldur Lúðvíksson þjálfari í Skylmingarfélagi Reykjavíkur 10-14 nemendur geta tekið þátt í þessari smiðju. Mikilvægt að þeir sem skrá sig í þessa smiðju láti koma fram hvort þeir eru rétthentir eða örvhentir
Myndlistarsmiðja Brynjar Björnsson fyrrum nemendi í GBF mun sjá um þessa smiðju. Brynjar er nemandi á listabraut FG og hefur verið að gera ótrúlega spennandi hluti í myndlist. Það verður spennandi fyrir ykkur sem hafið áhuga á þessu sviði að vinna með Brynjari þessa helgi. 8-10 nemendur komsast að í þessa smiðju

Mikilvægt að nemendur velji sig inn í smiðjur í vikunni, þannig að tímanlega sé hægt að raða í smiðjurnar og leiðbeinendur fái upplýsingar um fjölda í hverri smiðju fyrir sig.

Nemendur gista í skólanum eina nótt, eiga saman skemmtilega kvöldstund þar sem nemendafélögin sjá um að vera með kvöldvöku, ratleiki, sundsprell eða hvaðeina sem þeim þykir skemmtilegt. Foreldrar nemenda hjálpa til og taka kvöld- og næturvaktir.

Í lok smiðjuhelgarinnar koma foreldrar að sækja nemendur og gefst þeim þá tækifæri til að kynnast því sem unnið var að. Nemendur og kennarar gera grein fyrir verkefnum helgarinnar og afrakstur

þeirra er sýndur. Vinna nemenda er metin af kennara eða leiðbeinenda hverrar smiðju fyrir sig í lokin og er hluti af námsmati valgreina skólans.

Skólinn hefur verið einkar heppinn með það að nærsamfélag hans hefur lagt honum lið og komið að smiðjunum með einum eða öðrum hætti. Landbúnaðarháskólinn á Hvanneyri hefur t.d. lagt til aðstöðu fyrir kennslu í logsuðu, pinnasuðu, járnsmíði og stálsmíði. Björgunarsveitir héraðsins hafa kennt nemendum heilmargt sem lítur að starfi björgunarsveitanna svo sem leitarstarfi, snjóflóðaleit, sigi, klifri, björgun úr vatni, farið í hella- og jöklaferðir og farið yfir fyrstu hjálp og margt fleira. Bridgefélögin, skákfélögin og leikfélögin hafa komið að vinnu í smiðjum, ásamt mörgum einstaklingum í héraði sem hafa margt fram að færa. Með þessu aukum við þekkingu nemenda á því sem fram fer og unnið er að í samfélaginu okkar í Borgarbyggð.

Hér má sjá lista yfir allar smiðjur sem hafa verið í boði:

  • § Frétta- og fjölmiðlasmiðja
  • § Glerlistasmiðja
  • § Sjálfsvörn
  • § Skylmingar
  • § Reiðtygjasmiðjur
  • § Kvikmyndagerð
  • § Ljósmyndun
  • § Pinna- og logsmiðjur
  • § Járn- og stálsmíði
  • § Eldsmiðjur
  • § Vélvirkjun
  • § Fatahönnun
  • § Forritun
  • § Söng- og tónlistasmiðjur
  • § íþróttasmiðjur (handknattleikur, körfuknattleikur, knattspyrna, blak og amerískur fótbolti)
  • § Grjót- og torfhleðsla
  • § Matreiðsla (ítölsk, mexikönsk, austurlensk, marókósk matargerðarlist)
  • § Bakarasmiðjur
  • § Leiklistarsmiðjur
  • § Stumpsmiðja (ásláttur, líkamstjáning og frumlegar hreyfingar)
  • § Myndlist
  • § Skyndihjálp
  • § Nýsköpunar og legosmiðjur
  • § Vísinda- og tilraunasmiðjur
  • § Silfursmíði
  • § Skartgripasmiðja
  • § Tie dye taulitun
  • § Ýmiss konar listasmiðjur, s.s. dans, fjöllist, afrískur trommuleikur, afródans, magadans, hipp hopp, street dance
  • § Skák
  • § Hárgreiðslu- og fléttusmiðjur
  • § Förðun- og húðumhirða
  • § Bridge
  • § Spilasmiðjur
  • § Kick box smiðjur
  • § Rafiðnaðarsmiðja
  • § Kransaskreyting
  • § Leðurlistasmiðja
  • § Kökuskreytinga- og bakarasmiðja
  • § Jóga og núvitundarsmiðja
  • § Útskurðar- og tálgunarsmiðja
  • § Leðurlistasmiðja

Þeir sem velja matreiðslu hafa séð um að elda mat fyrir hópinn meðan á smiðjunni stendur; kvöldverð á föstudegi og hádegisverð á laugardegi. Það er gaman að sjá hversu vel nemendur leggja sig fram um að bjóða skólafélögum og gestum upp á góðan og framandi mat, ásamt því að vanda framreiðsluna. Oft skapa þeir skemmtilegan blæ í matsalnum sem tengist því að hafa viðeigandi tónlist eða eitthvað sem minnir á þann stað sem matreiðslan á uppruna til.

Það er alltaf spenna fyrir smiðjunum og virkilega gaman að fylgjast með áhuga nemenda, sem og þeirra sem taka að sér að sjá um smiðjurnar hverju sinni. Það má segja að sjá megi nemendur blómstra í verkefnum sínum. Þeir gleyma stund og stað þar sem tímarammi venjubundinna kennslustunda gleymist algerlega.

Almenn ánægja er með verkefnið bæði hjá nemendum og foreldrum sem hefur komið fram í könnunum og mati nemenda eftir helgarnar. Þeir sem hafa kennt í smiðjunum kveðja okkur yfirleitt

með þeim orðum að þeir séu tilbúnir í aðra smiðjuhelgi ef áhugi sé fyrir því. Það eru góð meðmæli með nemendum okkar og verkefninu sjálfu.